Ўзбекистон давлат муассасалари ва жамоат хизмати ходимлари касаба уюшмаси Республика Кенгаши ва “Ипак Йўли” Акционерлик Инновация тижорат банки ўртасида ижтимоий шериклик тамойили асосида мустаҳкам алоқалар йўлга қўйилган.

Жорий йилнинг 18 март куни Банк ва Республика Кенгаши ўртасида 2017-2019 йилларга мўлжалланган тармоқни ижтимоий-иқтисодий ривожлантиришнинг асосий йўналишлари, меҳнат шартлари ва унга ҳақ тўлашни, банк тизимида ишловчи ходимларининг ижтимоий кафолатларини белгилаб берувчи Тармоқ келишуви янги муддатга имзоланди.

Ушбу Келишув Ўзбекистон Республикаси Конституцияси, Ўзбекистон Республикасининг Меҳнат кодекси, “Аҳолини иш билан таъминлаш тўғрисида”, “Меҳнатни муҳофаза қилиш тўғрисида”, “Касаба уюшмалари, уларнинг ҳуқуқлари ва фаолиятининг кафолатлари тўғрисида”ги Қонунлари, Ўзбекистон Республикаси Вазирлар Маҳкамаси, Ўзбекистон касаба уюшмалари Федерацияси Кенгаши ва Ўзбекистон Савдо–Саноат палатаси ўртасида 2017-2019 йилларга тузилган Бош Келишуви ва тарафларнинг ўзаро муносабатларини тартибга солувчи бошқа норматив-ҳуқуқий ҳужжатлар асосида ишлаб чиқилган бўлиб, ундаги шартлар Иш берувчи тизимидаги ходимларнинг ижтимоий-иқтисодий ҳуқуқлари ва имтиёзларини тўла кафолатлайди.